Tuesday, March 29, 2011

අපේ බුදුන් අපි වැන්දා....පෙරලි පෙරලි අපි වැන්දා....

සිරිපා වන්දනා කලෙමි. අති පූජනීය, මහත් ශ්‍රද්ධාවෙන් වන්දනා කල යුතු, අනුහස් වලින් පිරි පූජා භූමියක් වන්දනා කලෙමි.

මේ මා සිරිපා කරුණා කල පලමු අවස්ථාවයි. යමෙක්, යමක් පිලිබද යහපත් හෝ අයහපත් ආකල්පයක් ඇතිවන්නේ එය දකින කියන පලමු අවස්ථාවේ සිතෙහි පහල් වන හැගීම් දැනීම් අනුවය. ඒ අනුව මා අත්වින්දේ මා අසා දැන සිටි පුණ්‍ය භූමිය නොවන බව මගේ වැටහීමයි. කොටින්ම සිත කලකිරවන, පිලිකුලට පත්කරන බොහෝ දෑ හැරෙන්නට සිත නිවන සනහන දෑ ඉතාමත් අල්ප විය. මාගේ එම වැටහීම නිවැරදි නොවේනම් සමන් දෙවිඳු මට සමාව දෙත්වා! එසේම සිරිපා කිහිප වතාවක් කරුණා කල ඔබේ වැටහිම මීට වඩා වෙනස් වනු ඇත. එසේ නම් පහත සදහන් සිදුවීම් මා සිරිපා කරුණා කල දිනයේදී පමණක් සිදුවූ අහඹු සිදුවීම් වෙන්නට ඇත. එයද එසේනම් ඔබද මට සමා කරත්වා!

අප සිරිපා කරුණා කලේ හැටන් පාරෙනි. නල්ලතන්නියේ වාහනය ගාල් කර ගමන් ආරම්භ කල අප මුල් හරියේදී නා නා ප්‍රකාර කඩ වීදි පසු කලෙමු. කරුණා කීරිමට අවශ්‍ය ඇදුම් පැලදුම් හා ආයිත්තම් පහසු මිලකට ලබා ගැනීමට ඒමගින් අවකාශ ලැබුනි. දෙරණ FM නාලිකාව මගින් ගෙන ගිය විකාශය අතිශය ප්‍රයෝජනවත්, හරවත් හා කාලෝචිත විය. මඟ හැරුන පුද්ගලයන්ගේ නම් ගම් කියවීම හැරුනු කොට ශ්‍රී පාද පුද බිම ආශ්‍රිත ඉතිහාසය, වතාවත්, දහම් කරුණු, බුද්ධාලම්බන ප්‍රීතිය දනවන ගීත, ගමන පුරා හැසිරිය යුතු ආකාරය ඒමගින් ඉතා අපූරුවට ප්‍රචාරය විය. මේ සියල්ල සමගින් දෙයියනේ කියා අපි රාත්‍රී 8.30 පමන කරුණා කිරීම ඇරඹුවෙමු.

සර් ජෝන් කොතලාවල මැතිඳු ශ්‍රී පා මලුවට වූ භාරයක් ඔප්පු කිරීම වස් ඉදිකරන ලද මකර තොරණ පසුකරත්ම අපට හමු වූයේ සමන් දේවාලය යැයි කියා ගනිමින් සුමන් සමන් දෙවිඳුට නිගා දෙන තැනකි. බොහෝ බැතිමතුන් එහි නැවතී සමන් දෙවිඳුට භාර වී එහි වූ පහනින් තෙල් ස්වල්පයක් හිසෙහි තවරා ගෙන ශ්‍රද්ධාවෙන් ගමන අරභති. එහෙත් එහි සිටින කපු මහතාට මෙය එතරම් දිරවන්නේ නැත. ඔහු ආශිර්වාද නූලක් බැන්දවීමට යන එන ජන ගඟට ඉවරයක් නැතිව කෑ ගසයි. එය ප්‍රයිවට් බසයකට සෙනඟ Load කරන කොන්දොස්තර කෑ ගැසීමකට හෝ පේමන්ට් එකේ බඩු විකුනන වෙලෙන්දෙකුගේ කෑ ගැසීමට නොදෙවනිය. නූල ගැට ගසන ගමන් නියෝගාත්මක හඩින් ආධාරයක් කරන ලෙසද එසේ නැතිව යන්නට ලෑස්ති නොවන ලෙසද තර්ජනය කරයි. එය හරියටම ඉතා අඩුවට බෙල්ට් එකක් විකුනා ඒ විගසම එහි හිල් ටික විද, හිල් විදීම සදහා අස්ප ගණන් ඉල්ලන හා එය ගෙවීම ප්‍රතික්ශේප කරන කල්හි පාරිභෝගිකයාට තග දමන පිට කො‍ටුවේ පේමන්ට් වෙලෙන්දෙකුගේ බිස්නස් trick එකක් වැනිය.

ඉන් අනතුරුව එලඹෙන්නේ සිරි පා කරුණා කිරීමට මත්තෙන් පන්සිල් සමාදන් වීමට ඇති බුද්ධ ප්‍රතිමා වහන්සේ අභියසටය. එහිද තවත් වෙලදාමකි. Non stop කැසට් පටයක් මෙන් ඉතා වේගයෙන් පිරිස පංචශීලයෙහි පිහි‍ටුවන චීවරධාරියා ( උන්නාන්සේට ස්වාමීන් වහන්සේ කීමට මට සිත දෙන්නේ නැත) ඉනික්බිති කපු කමට බසී. එහිදී සෝවාන් පලයට පවා පත් වූ සුමන් සමන් දෙවිඳුන්, ඉතා බියකරු කාලි දෙවඟන වැනි පලි ගන්නා දෙවියෙක් ලෙස චිත්ත රූපයක් සැදැහැවතුන්ගේ සිතේ නිර්මාණය කරමින් තම මූලික කර්තව්‍යට එලඹෙයි. මුදල් නොදී මග හැර යාමට සූදානම් නොවන ලෙස දන්වමින් සැමට ආධාර කරන ලෙස දන්වයි. මොහොතකට පෙර බියකරු කතා ඇසූ හුදී ජනතාවට තවත් කතා කුමටද? කට්ටියම පෝලිමේ ආධාර කිරීමට පෙල ගැසේ. සැදැහැ සිතින් ආධාර කිරීම යහපති. නමුත් මේවායේ සිදුවන්නේ දෙවියන් බුදුන් විකුණමින්, බිය වැද්දීම් සිදුකරමින් කෙරෙන් මුදල් මංකොල්ලයකි.

තවත් දුරක් ගිය තැන තවත් චීවරධාරියෙක් බැම්මක් උඩ වාඩි වී ඉතා ග්‍රාම්‍ය ලෙස ජනතාවට පසකින් පෙනෙන වෙලද කුටි කිහිපයක් පෙන්වමින්, එතැනට ගොස් ආශිර්වාද නූලක් පලදවා ගන්නා ලෙස දන්වයි. එය කිසිසේත්ම ස්වාමීන්වහන්සේ නමක් විසින් වදාරන සෞම්‍ය භාෂා විලාශය නොවේ. යන එන ගැහැණු ළමයින්ට විහිලු කරමින් ඔහු එතැන විකාර රූපී රංගනයක් කරයි. තවද ඔහු පෙන්වන ඒ කුටි වලදීද සිදුවන්නේ නැවතත් පිරිත් කලා යැයි පවසමින් නා නා වර්ණ නූල් අත පලදා මුදල් ඩැහැ ගන්නා ව්‍යපාරයකි.

මග දිගට විවිධ වෙලඳ ආයතන වලින් පවත්වන් දන්සැල්, සහන සේවා තිබුනි. තම වෙලඳ නාමය ප්‍රචලිත කර ගැනීම් ඔවුන්ගේ අභිප්‍රාය වුවද ඒ සෑම දන්සැලක්ම, සහන සේවාවක්ම සිය උපරිම සේවා සත්කාරය බැතිමතුන්ට ලබා දුන්හ. Dialog කතා දන්සැල, Samahan බාම් දන්සැල, Panadol හදිසි අනතුරු හා වෛද්‍ය ඒකකය ඒ අතර ලෙංගතු සේවා සැපයූවන් වූහ. ඊනියා (සිද්ධාලේප) වෙදා නම් එහිදීද වෙලද කටයුතු නිර්ලජ්ජී ලෙස සිදු කරමින් සිටියේය.

සීත ගඟුලෙන් පසු අපි මහා ජන ගඟකට මැදි වුනෙමු. නගින නඩත්, නැගල බහින නඩත් අතර මහා තදබදයකි. අපේ මිනිසුන්ට මූලික විනයක්, හික්මීමක්වත් නොමැති බව මට තවත් වරක් සැක හැර දැන ගැනීමට අවස්ථාව ලැබුනි. දකුනෙන් ගමන් කිරීමට පාසැල් යන කාලයේ සිටම හුරු කරවයි. රෝහල්, බස්-දුම්රිය නැවතුම්පලවල්, බැංකු වල දකුනෙන් ගමන් කරන ලෙස දන්වා බෝඩ් එල්ලා තිබේ. අඩි සටහන් ලකුණු කර තිබේ. එමගින් තදබදය ඉතා අවම කර ගත හැක. මන්ද දෙපැත්තටම ගමන් කරන්නන්ට මාර්ගය අවහිර නොවන බැවිනි. නමුත් ඒ සරල විනයවත් මා එකී ජන ගඟ තුල දු‍ටුවේ නැත. එම නිසා අඩියක් හෝ පෙරට තැබිය නොහැකිව තදබදයේ හා සීතලෙන් මිරිකි මිරිකී සිටීමට සැමට සිදුවිය. ඉතා විශාල පිරිසක් ඉහලටද, එපමනම පිරිසක් පහලටද ගමන් කරමින් සිටියහ. ඒ අනුව පහලට බසින්නන්ටද මාර්ගයේ සමාන ඉඩක් ලබා දිය යුතුව තිබුනද එම රීතිය ගරු කිරීමට බොහෝ දෙනෙක් මැලි වූහ. තවත් පිරිසක් පහලට බසින්නන්ටද ඉඩ ලබා දීමට පේලි දෙකක් පමනක් සෑදෙන්නැයි talks issue කරමින් ඔවුන්ම තවත් තුන්වැනි පලියක් නිර්මාණය කරමින් ඉදිරියට යමින් මග ඇහිරූහ. එක් අතකට කම්පා විය යුතු නැත. ලංකාවේ සෑම තැනකම සිදුවන දේ එතැන සිදු නොවී තිබීමට කිසිදු හේතුවක් නොමැත.

සිරිපා නගිද්දී කට පරිස්සම් කරගත යුතුයැයි කියන රීතියක් මා අසා තිබේ. නමුත් එවැන්නක් සිදුවන බවක් සිතීමට පවා මට සිදුවන වටපිටාවක් එහි නොවීය. කාන්තා පාර්ශවයට නොහොඹිනා- අවර කතා කියමින්, බුදු ගුණ කවි විකෘති කර ගායනා කරමින් හැසිරෙන තරුණයන් ඇති පදම් සිටියහ. ඔවුහු දුම්වැටි බිවූහ. ඔවුන් වෙතින් මත්පැන් ගඳ වහනය විය. ඔවුන් පාලනය කිරීමට පෙනෙන හෝ නොපෙනෙන බලවේගයක් එහි නොවීය. එසේම පාලනය විය යුතු යැයි කල්පනා වීමටවත් ස්වයං විනයක් ඔවුන් තුල ඇති බවක් පෙනෙන්නට නොවීය.

සිරි පා මලුවට යන මග දෙපස, පරිසරය සු‍රැකීමේ වැදගත්කම දැක්වෙන පුවරු ප්‍රදර්ශනය කර ඇත. අඩියෙන් අඩියට කසල බදුන් ඇත. එහෙත් මග දිගටම පරිසරය අපවිත්‍ර කරමින් පොලිතීන් හා අනෙකුත් අපද්‍රව්‍ය විසුරුවා ඇත. සීත ගඟුලටද මේ අමන ‍රැලගෙන් ගැලවීමට හැකි වී නැත. එහිද පොලිතීන්, ප්ලස්ටික් බෝතල් ආදී අපද්‍රව්‍ය පා වෙමින් පවතී. මේ රටේ මිනිස්සු තනිකරම කෙලින්නේ පිස්සුයැයි කී කතාව තුන් කල් බලා කීවකි. බැතිමතුන් සිරි පා කරුණා කිරීමට මත්තෙන් නා පිරිසුදු වෙන සීත ගඟුලටද කැලි කසල දමන වසලයන්ගෙන් විනයක් බලාපොරොත්තු විය හැකිද?

‍රැය පුරා නිදි වරා අවසන උඩ මලුවට කරුණා කලෙමු. බුද්ධාලබ්භන ප්‍රීතියෙන් අති දුෂ්කර ගමන් මඟක් අවසන් කර අති උතුම් ශ්‍රී පාදය වන්දනා කිරීමට බලාපොරොත්තුවෙන් මලුවට පිවිසෙන්නන්ට එතැන සිටින පුද්ගලයන්ගේ (කපුවන් විය යුතුයැයි සිතමි) ගණන් බැලීමට සිදිවේ. තදියම් කරමින් බැතිමතුන්ගේ බෙල්ලෙන් අල්ලා ශ්‍රී පාදයට හිස පහත් කරන ඔවුහු, කුඩා දරුවෙක් අත‍රැදි මවක්, වයසක කාන්තාවක් විවිධ දුෂ්කරතා හේතුවෙන් වන්දනා මාන කිරීම අංශු මාත්‍රයකින් හෝ පමා වේ නම් රොස් හඩින් මොර දෙති. එවැනි නොහොඹිනා හැසීරීම් හමුවේ කෙතරම් පූජනිය වස්තුවක් හමුවේ වුවද පෘතංජන අපේ හිතට ක්‍රෝද සහගත සිතුවිලි නැගීම නොවැලැක්විය හැකිය.

පහලට කරුණා කරද්දී එතරම් තදබදයක් නොතිබූ බැවින් දෙයියනේ කියා ඉක්මනින් සිරිපා පා මුලට කරුණා කලෙමු. කෙසේ නමුත් මා එදා කරුණා කලේ මා දැන සිටි සිරි පා ගමන නොවේයැයි මට හැඟේ. එහි එතරම්ම අවර, නින්දිත, විනය හා රීති විරෝධී, බුදු දහමට නිගා දෙන දෑ සිදුවිය. සමන් දෙවි අඩවියේ සිදුවන මෙවැනි නොපනත්කම් ඔබ වහන්සේ ඉවසා වදාරනවාද? නැතහොත් සෝවාන් ඵලයට පවා පත්වූ කරුණාබර ඔබ වහන්සේ මෙම නොපනත්කම් හමුවේ කල කිරී මෙම පූජා භූමියෙන් පිටවී ගොස්ද? සියල්ල අවසන මා තුල ඉතිරි එම සිතුවිල්ල පමණි.

4 comments:

  1. මොකට කමෙන්ට් නොකලත් මේකට නම් කමෙන්ට් කරන්නම හිතුනා. මමත් මේ මාසේ මුල සිරිපා කරුණා කළා. මමත් කෝඩු. ඔය සහෝ වගේම මමත් බලාපොරොත්තු වුනු අසිරිය ඒ ගමනේ තිබුනේ නෑ. ඇත්තටම අවසානයේ ඉතිරි වුනේ කළකිරීමක් විතරයි. ගසාකන සාදුලා, කාලකන්නි පිංවතුන් හා තැරැව්කාර කපුවන් මමත් අත්දැක්කා. එදාට වඩා අද බොහෝ පහසුකම් තිබුණත් මීට අවුරුදු 20-30 කට කලින් සිරිපා වැන්දා නම් හොඳ යැයි මට සිතේ. එතකොට ඉතින් අපි ලොවෙත් හිටියෙ නෑ නොවැ. මොනවා කරන්නද ? ලංකාවේ හැටි තමා !!!

    ReplyDelete
  2. This is really a great article. I am really disappointed what has happened to Buddhist pilgrims.however as we know, whichever legend we care to believe, this place has been a pilgrimage centre for over thousands of years,but people just don't realize the value of our heritage.

    ReplyDelete
  3. Thanks both. The situation is same in almost all places. But it hurt me more @ Sri Pada as there was a great discrepancy b/w my expectations & reality.
    "ගසාකන සාදුලා, කාලකන්නි පිංවතුන් හා තැරැව්කාර කපුවන්".....මේ වචන ටික තමයි උන් ටිකව හදුන්වන්න තිබ්බ හොදම වචන ටික. මේ අවනඩු සමන් දෙවියන්ට කියනව ඇරෙන්න වෙන මොනව කරන්නද?

    ReplyDelete
  4. yes, I do know.... that hurts me a lot as well. I am away from Sri Lanka and I feel more value of my country more than people over there.

    ReplyDelete

Related Posts Plugin for WordPress, Blogger...