Thursday, April 14, 2011

ඔබත් කෙල ගසන්නෙක්ද?

උදෑසන එලියට බසින මට දෙමටගොඩ බස් නැවතුමට යාමට මීටර 300 පමණ ඇවිදීමට සිදුවේ. ත්‍රීවීල්, කන්ටේනර්, කුකුලුන් ප්‍රවාහනය කරන truck රථ වැනි සුලබ දසුන් අතරේ මා නොවැරදීම දකින තවත් දසුනක් ඇත. ඒ තාර පාරේ හා ඒ අවට මිනිසුන් විසින් ඉවතලූ තඩි කෙල පිඩවල්ය. උදෑසනම එවන් අප්‍රසන්න දසුනක් මැවීමට දායකවන තවත් පිරිසක් තව දුරටත් මීටර 10න් 10ට කෙල පිඬවල් හෙලමින් ගමන් කරනා අයුරුද මට පෙනේ.

තමන්ගේ සිරුරෙන් පිටවන අපදව්‍ය වලින් පොදු ස්ථාන අපවිත්‍ර කිරීම නොහොඹිනා ක්‍රියාවක් බව අමුතුවෙන් කීමට අවශ්‍ය නොවේ. පොදු ස්ථානයක මුත්‍රා කිරීම, මලපහ කිරීම සමාජ ආචාරධර්ම වලට පටහැනි නොහොඹිනා ක්‍රියාවක් වන්නේද, එබදු ස්ථාන කෙළ පිඬු වලින් අපවිත්‍ර කිරීමද එබඳුම පිලිකුල් සහගත නොහොඹිනා ක්‍රියාවකි.

ඛේටය ප්‍රධාන වශයෙන් සමන්විත වන්නේ ජලයෙනි. ඊට අමතරව ලවණ, ශ්ලේෂ්මල, ජීරක එන්සයිම හා මිලියන ගණනක් බැක්ටීරියා එහි අන්තර්ගතය. ආහාර මාර්ගය හා ස්වසන මාර්ගය එකිනෙක සම්බන්ධ නිසා මෙම බැක්ටීරියා අතර ස්වසන මාර්ගය ආශ්‍රිත රෝගකාරක බැක්ටීරියා හා වෛරසද මිලියන ගණනින් ඇත. ( සාමාන්‍යයෙන් ඛේටය එක මිලි ලීටරයක ක්ෂුද්‍යජීවීන් මිලියන 500 පමණ ඇත).

මුඛයේ ඇති ප්‍රධාන ඛේට ග්‍රන්ථි 3කින් හා අවශේෂ ග්‍රන්ථි ඉතා විශාල ගණනකින් නිපදවෙන ඛේටය ස්‍රාවය වීම සිදුවන්නේ ප්‍රත්‍යානුවේගී ස්නායු පද්ධතියේ පාලනයෙනි. සාමාන්‍යයෙන් දිනකට ඛේටය 0.75-1.5L ප්‍රමාණයක් ඛේට ග්‍රන්ති වලින් නිපදවයි. ආහාර පිලිබද සිතුවිල්ලකදී, අපුල දෙයක් දැකීමේදී, මහන්සි වී සිදුකෙරෙන වැඩක් අතරතුරදී, දුම්කොල ආශ්‍රිත නිෂ්පාදන පරිභෝජනයේදී ඛේට ශ්‍රාවය වැඩිවේ.

ඇතමුන් අපුලට කෙල ගසති. සමහරු පුරුද්දට කෙල ගසති. තවත් සමහරු සෝබනේට කෙල ගසති. ඇතමෙක් ඇස් වහ කටවහ වලට බියෙන් කෙල ගසති. තවත් අයෙක් තරහව, අප්‍රසාදය පෙන්වීමට කෙල ගසති.මේ කවුරුත් අවසානයේ තමාගේ ශරිරියේ ශ්ලේශ්මල අති විශාල බැක්ටීරියා ප්‍රමාණයක් සමග අවට පරිසරයට එක් කරති.

බල්ලන් තම සීමා මායිම් ලකුණු කිරීමට මුත්‍රා කරන ආකාරයෙන්ම මිනිසුන් තම සීමාව හා බලය පෙන්වීමට කෙල ගැසීම යොදා ගන්නා බව ඇතැම් සමාජ විද්‍යාඥයන් පෙන්වා දී තිබේ. පිරිමින් අතර කෙල ගැසීම ගැහැණුන්ට වඩා බහුල වීමට මෙය හේතුවක් විය හැකි බවට ඔවුන් ප්‍රකාශ කරති. මන්ද බලය, සීමාව පිලිබද වැඩි අවධානයක් තිබෙන්නේ පිරිමි පාර්ශවය අතර බැවිනි.

ප්‍රසිද්ධ ස්ථාන වල කෙල ගැසීම කෙතරම් අශෝබන ක්‍රියාවක්ද යන වග අපි මේ ලිපිය මුලදී කතා කලෙමු. යමෙක් ඇවිදින් ඔබේ සාලයේ කෙල පිඩක් හලා ගියහොත් ඔබට ඇතිවන්නේ කුමනාකාරයේ හැඟීමක්ද? පොදු ස්ථානයක කෙල ගසනු දැකීමෙන් අන්‍යන්ට දැනෙන හැඟීම ඊට කිසි ලෙසකින් වෙනස් නොවේ.

ඛේටය සමඟ වාතලයට මුසුවන ක්ෂුද්‍රජීවීන් මඟින් ඇතිවන සෞඛමය අවදානම කිසි ලෙසකින් අවතක්සේරු කල හැකි නොවේ. හැදියාවක් නැති මිනිසෙකුගේ ක්‍රියාවකින් වාතලයට පිවිසන පිවිසෙන මිලියන ගණනක් වූ බැක්ටීරියා හා වෛරස විවිධ ස්වාභාවික තත්ව යටතේ පරිසරයේ ‍රැදී සිටිමින් තවත් අයෙකුගේ ආශ්වාස වාතය හා ඔහුගේ සිරුරට ඇතුලුවී රෝගය ව්‍යප්ත කරති. ක්ෂය රෝගය ප්‍රමුඛ කර ගත් සිය ගණනක් වූ ස්වසන පද්ධතිය ආශ්‍රිත රෝග තම ව්‍යප්තිය තහවුරු කර ගන්නේ එපරිද්දෙනි. (ක්ෂය රෝග කාරක TB බැක්ටීරියාව හා අනෙකුත් බොහෝ ක්ෂුද්‍රජීවීන් දැඩි සූර්ය රශ්මිය හමුවේ විනාශ වේ. එනමුදු අදුරු, සීතල තැන් වලට මුදා හැරෙන මෙම ජීවීන්ට කාලයක් පුරාවට සක්‍රීයව හිදිමින් රෝගය සම්ප්‍රේෂණය කල හැක.)

දුම්පානය කරන්නන්ට පොදු ස්ථාන වල හිදිමින් දුම් පානය කරමින් අවට පරිසරය දූෂණය කිරීමට හා අවට සිටින්නන්ට බලහත්කාරයෙන් අක්‍රීය දුම්පානය සිදුකරවීමට නීතියෙන් අවසර නැත. එසේ නම් කෙල ගසන්නන්ට පොදු ස්ථාන වල කෙල ගසමින් භයානක විසබීජ වලට හුදී ජනයා නිරාවරණය කිරීමටද නීතියෙන් අවසරයක් නොතිබිය යුතුය.

කෙසේ නමුත් මෙවන් පුරුදු නීති රීති මගින් වෙනස් කල හැකියැයි සිතීම උගහටය. අවශ්‍ය වන්නේ ආකල්පයමය වෙනසකි.

තමා ගැන මෙන්ම අනුන් ගැනද සිතීමට හුරු කරවන ආකල්පමය වෙනසකි.

4 comments:

  1. ඔව්වා ලංකාවේ ඉන්න සීලාචාර ගෝත්‍රිකයන්ගේ වැඩ . . .
    හැත්ත

    ReplyDelete
  2. thank you for opening others' eyes for such an important but neglected issue... Yes we need a attitudinal change.

    ReplyDelete
  3. ඔය වැඩේ නම් මටත් හරිම අප්‍රසන්න දෙයක් තමයි.කට්ටිය කොහෙන් පුරුදු වෙනවද මන්දා

    ReplyDelete
  4. අවශ්‍යතාවයකට කරන දෙයකුත් නෙවෙයිනෙ. නිකන් ඉන්න බැරිවට, පුරුද්දට කරන අශීලාචාර වැඩක්

    ReplyDelete

Related Posts Plugin for WordPress, Blogger...